Ekkert útihlaup fyrir Hress á fimmtudag

Þessi hugmynd að hafa Eskimóabolta fæddist hjá strákunum í Lækjarskóla í morgun og mér fannst hún svo frábær þarna í logninu og púðursnjónum. Ég sá fyrir mér snjóinn þeytast undir stjörnubjörtum himni, hávær köll, hlátrasköll og heitt kakó í brúsa á eftir. Jafnvel eggjabrauð.

En skjótt skipast veður í lofti og himininn tók að grána og vind að hreyfa. Í kvöld var vart stætt en ég var ánægður hvað það mættu margir til í slaginn. Þetta veit á gott. Eins og ég sagði þá er sennilega betra að vera spila fótbolta í vondu veðri en að vera að berja ís af togara á Halamiðum. En þið eruð efni í togarajaxla.

Eftir 40 mínútur í Eskimóaboltanum þá fluttum við okkur inn í Risann og tókum Brazza með stelpunum í 3. flokki sem mynduðu eitt lið Bayern Munchen en fyrirliði þeirra var Viktoría van Bommel. Þemað var einmitt þýska deildin. Hoffenheim og Schalke 04 náðu sér ekki á strik en Werder Bremen gerði síðbúna atlögu að titlinum. Borussia Dortmund unnu hvern leikinn á fætur öðrum á Westfallen stadium en 15 sigurinn sem hefði tryggt þeim titilinn lét á sér standa og virtist sem þeir væru sprungnir á limminu. En þó fór það svo að lokum að þeir tryggðu sér góðan sigur.

Þetta skildi þó ekki vera fyrirboði um baráttuna í þýsku Bundesligunni þar sem einmitt Dortmund hefur forystu? Það skyldi þó ekki vera að Brazzabolti í 3. flokki gæfi betri vísbendingu en kolkrabbinn þýski og tíkin Pamela (hundur)?

Á fimmtudaginn er ekkert útihlaup fyrir Hress því þá er spáð kolvitlausu veðri og nú ætla ég að hafa vaðið fyrir neðan mig. Sá sem kemur fyrstur með skýringu á þessu orðtaki fær ís á næsta skemmtikvöldi.