Real Madrid og Tenerife sigurvegarar kvöldsins

Brazzabolti var spilaður á báðum æfingunum í kvöld og var La Liga þema. Á fyrri æfingunni öttu kappi Real Madrid, Real Valladolid og Sevilla. Andalúsíupiltar riðu ekki feitum hesti frá kvöldinu. Fengu tvo punkta. Real Madrid sem léku í appelsínugulum varabúningum þutu eins og mjóhundar af stað og fengu fjóra vinninga í röð án þess að nokkur fengi rönd við reist en þá var komið að litla liðinu í Madríd, Real Valladolid. Þeir hófu nú mikla sigurgöngu og jöfnuðu Madridinga og mótið endaði í hreinum úrslitaleik sem var spilaður á Santiago Bernabau. Þegar allt var á suðupunkti skoraði Antonio Lopez fyrir Real Madrid og tryggði þeim sigur gegn gulklæddum Valladolidmönnum.

Síðari hluti mótsins var einnig gríðarlega spennandi. Þar börðust Atletico Madrid, Osasuna og Tenerife. Atletico byrjaði gríðarlega sterkt og rétt eins og nágrannar þeirra í Real Madrid fengu þeir fjóra punkta í röð en þá fóru athyglisverðir hlutir að gerast. Osasuna og Tenerife höluðu nú inn stig eins og grænlenskir sjómenn á úthafsrækjuveiðum. Mótið endaði í mexíkóskri grýtu. Í sannkölluðum suðupotti. Osasuna endaði með 4 stig og tapaði síðasta leiknum fyrir Tenerife sem þar með endaði með 5 stig eða jafnmörg og Atletico. Osasunamenn voru ósáttir. Jón Már sparkaði í stöng, Brynjar Geir bölvaði hátt. Enda voru þeir með gríðarsterkt lið á pappírnum.

Því varð hreinn úrslitaleikur milli Tenerife og Atletico og fór leikurinn fram á Kanaríeyjum þar sem heimavöllur Tenerife er. Leikurinn var afar varfærinn, hvort sem það var spennan sem þrúgaði leikmenn eða brennandi heit sólin en leikurinn var spilaður um miðjan dag til að þóknast sjónvarpsáhorfendum í Evrópu. En leikurinn endaði 0-0 og því varð að grípa til bráðabana í vítakeppni. Varnarmaður Tenerife Þorgeir Gonzales sendi Dorientes í rangt horn. Kristopolus hinn gríski markvörður Tenerife var næstum búinn að verja frá Sigga K Forlan. Arnar Steinn Higuain sendi Dorientes aftur í rangt horn. En Brynjar Aqueiro hægri kantur Atletico sendi boltann hárfínt framhjá markstöng Tenerifemarksins og leikmenn Tenerife sem og eyjaskeggjar allir fögnuðu fyrsta Spánarmeistaratitil Kanaríeyjaliðsins!